உணர்வுகள்

புது பிறவி!

2011-02-16T11:55:00.003+01:00

மீண்டும் பூக்கிறேன்
நான்
இம்முறை
எம்முறையுமில்லாக்
காற்றாய்
உன்னோடு கலந்த(து)
என் காதலைச் சொல்ல
என்னை நீ சுவாசிப்பாயா!

அவள் பெயர் என்ன?

2010-03-30T18:08:00.001+02:00

துளிர்த்தது
இன்று
நீண்ட
இடைவெளிக்கு
பின்
எனக்கும்
அவளுக்குமான
காதல்!
அவள் பெயர் என்ன?
அவள் பெயர் தமிழ்.

Resume

2006-08-14T10:53:00.000+02:00

I beleive i would be able to post messages again

முதுமையை வெல்ல முடியுமா?

2004-07-08T13:12:00.000+02:00

நம்ம 90 வயசு வாலிபர் அல்போன்ஸுக்கும் அவர் மனைவி ஸோபிக்கும் வரும் ஜுலை 15, '60-ம் ஆண்டு திருமண நிறைவு விழா. அதுக்குள்ளே என்னாச்சோ தெரியலை. இரண்டு பேருக்கும் உடம்பு சரியில்லை. 10 நாட்களுக்கு முன் அவருக்கு இருதய இரத்த குழாயில் 3 இடங்களில் அடைப்பு இருப்பது கண்டறியப்பட்டு சிகிச்சை அளிக்கப்பட்டது. அவரது மனைவிக்கு Alzheimer (நினைவு பிறழ்ச்சி) நோய் திடீரென்று முற்றி விட்டது. மீண்டும் குழந்தையாவே ஆகிட்டாங்க. இதுதான் வாழ்க்கை சுழற்சியோ?! இருந்தாலும் அல்போன்ஸ் மனம் தளரவில்லை. அவரது மனைவியை இன்னும் அதிகமா நேசிக்கறாரு ! அன்பா கவனிசுக்கிறாரு. மண நாளுக்காண அழைப்பிதழ்களில் அவரே கைப்பட முகவரியை தட்டச்சிக் கொண்டிருக்கிறாரு. முதுமையை வெல்லும் மாமனிதர்!!

மருந்து நிறுவனங்கள் உங்களிடம் மறைக்க விரும்புவது என்ன?

2004-06-29T18:09:00.000+02:00

நம்ம ஊர்ல இல்லைங்க! அமெரிக்காவுலேயே இப்படி நடக்குது?! புகழ்பெற்ற மருந்து நிறுவனமான Glaxosmithkline, " Paxil " என்ற மாத்திரையை மன நெருக்கடியைப் போக்குவதற்காகத் தயாரித்து வருகிறது. அதன் விளைவுகள் குறித்து சமீபத்தில் விஞ்ஞானிகளை கொண்டு ஆய்வு மேற்கொண்டது. அதன் தொடர்பான சாதகமான முடிவுகளை மட்டுமே வெளியிட்டது. இதனிடையே உண்மை நிலவரம் வெளியே வந்துவிட்டது. கொடுமை என்னவென்றால் Paxil மன நெருக்கடியைக் குணப்படுத்துவதை விட இளம் சிறுவர்களிடையே தற்கொலை எண்ணங்களை தூண்டுவதை தனது முக்கிய கடமையாகக் கொண்டுள்ளது. Glaxosmithkline- ன் இந்த சுயநலப்போக்கை நியூயார்க் நுகர்வோர் நீதிமன்ற நீதிபதி Eliot Spitzer வன்மையாகக் கண்டித்துள்ளார்.யாரைத்தான் நம்புவதோ?!!!

முழு விவரங்களை அறிய இங்கே மற்றும் இங்கே சொடுக்கவும்.

பதியம் போட்ட உணர்வுகள்

2004-06-25T13:42:00.000+02:00

என்றோ பதியம் போட்ட
உணர்வுகள்
உணர்ச்சிக் குவியலாய்
பாதுகாத்த
உள் தனலை
எரிமலை கக்குவதுபோல்
சில சமயம்
கோபமாய்
முரட்டுக் காதலாய்
ஆனந்த கண்ணீராய்
ஆழ்ந்த அரைவணைப்பாய்
பொங்கிப் பெருகும் அன்பாய்
வெடித்துச் சிதறும் அழுகையாய்
அலைகளாடும் நடனமாய்
வெற்றியின் தூண்டுகோலாய்
இப்படி ஏதாவது ஒன்றாய்
அல்லது எல்லாமுமாய்
வெளிபட்டுக்கொண்டே இருக்குமன்றோ?

மனத் தொடர்பியல் ! (Mind communication)

2004-06-24T11:41:00.001+02:00

நிசப்தம் மட்டுமே சாட்சியாகும்
இரவுகளில்
துணை தேடும்
தேரைகளின் ஒலி
கணவனின்
மனதின் ஓரத்தில்
எழுப்பும்
அலைகள்
பிரசவத்திற்கு தாய்வீடு சென்ற
அவளைச் சென்றடையுமா?

என் Brownies !

2004-06-21T21:37:00.000+02:00

ஒரு பதினைந்து இருபது வருடங்களா(?!!!!!!!) ஒரு சந்தேகம் இருந்தது. அது ஒரு வழியா இதோ இப்போ ஒரு பத்து நிமிடங்கள் முன்னர் தான் தீர்ந்தது. என்னன்னு கேட்கிறீங்களா? அது வந்துங்க இன்னைக்கி கல்லூரிவிட்டு வீட்டுக்கு வந்து வயித்தை ஒரேயடியா நிரப்பிட்டேன். உடனே நித்திரா தேவி தாலாட்டு பாட தொடங்கிட்டாங்க.என்னடா நிறைய வேலை இருக்கேன்னு..காலார (கால்ரா இல்லைங்க!!) ஒரு நடை போகலாம்னு கிளம்பினேன்.

கோடைமழை ஏற்கனவே பெய்துவிட்டதால பச்சைபசேல்ன்னு இந்த ஊரே பார்க்க அழகா இருக்கு.ஒரு பத்து அடி நடந்ததும் கூடவே "நடைமனிதன்" (அதாங்க walkman) எடுத்துட்டு வந்திருக்காலமேன்னு யோசிச்சேன். கொஞ்ச நேரத்துலேயே அது தேவையில்லைனு தெரிந்தது. இயற்கை இன்னும் இங்க சீர்குலையவில்லை. குயில்களின் குரல்களும் மற்ற பறவைகளின் கிச்கிசு..ச்ச்ச்..சுசு... ஓசையும்/இசையும் என்னை எங்கேயோ அழைச்சிட்டு போய்யிடுச்சு. திடீர்ன்னு கொழுகொழுன்னு ரெண்டு அழகான முயல்கள். நல்ல filter காப்பி நிறத்தில். அட அதுங்களுக்கு Brownies- நு பேரே வச்சிட்டேன்.

உடனே முயல் ஆமை கதை தான் நினைவுக்கு வந்துச்சு. பிறகு TV சீரியல் கணக்கா ஆரம்ப பள்ளி தொடங்கி மேல்னிலைபள்ளி வரை நான் பார்த்த "கூண்டில் அடைபட்ட முயல்கள்" ஒவ்வொன்றாய் கண்ணீர் சிந்திச்சுங்க. சீமைபுல் தின்றுவிட்டு கூண்டுக்குள்ளே சுத்தி சுத்தி வருங்க. அப்ப வந்துச்சுங்க நம்ம சந்தேகம் என்னடா உண்மையிலேயே முயல்களால் ஓட முடியுமான்னு?

Brownies-ஐ பார்த்தவுடன் திரும்ப அதே சந்தேகம். மெல்ல மெல்ல அருகே போனென். அதுங்க என்னை கண்டுக்கிட்டதாவெ தெரியலை. இரண்டும் காதல் வசனம் பேசிகிட்டு இருந்துச்சோ என்னவோ? அப்பப்போ பக்கவாட்டில் இருந்த புற்களை ஒரு கடி. ச்ரக் ச்ரன்னு ஒரு சத்தம்(என்னொட shoes தான்). காணவே காணோம்! போயே போச்! போயிந்தே ! Is gone !என்னோட Brownies தங்களால் ஓட முடியும்ன்னு நிரூபித்து விட்டன .அதுங்களோட ஓட்டத்துக்கு முன்னாடி P.T. உஷா நிற்க முடியாது. ஒரு வழியா என் சந்தேகமும் தீர்ந்துச்சு.ஆனால் என் Brownies-அ மறுபடியும் பார்க்க முடியுமா?!!!

திறந்தவெளி அரங்கு!

2004-06-16T00:22:00.001+02:00

ஆஹா! இந்த வார்த்தைகள் எவ்வளவு நினனைவுகளை கிளறிக்கொண்டு வருகிறது. முதல்நிலை பள்ளி சென்று கொண்டிருந்த சமயம் கோடைகாலம் என்றால் ஒரே கொண்டாட்டம் தான்.அதுவும் மாரியம்மன் திருவிழா என்ற பெயரில் ஒலிபெருக்கி எப்போதும் அலறிக்கொண்டே இருக்கும்.வாரம் இருமுறை தெருவடைத்து இரண்டு கம்பு நட்டு பெரிய திரைகட்டி "999" முறையாக 'சரஸ்வதி சபதம்' படம் அரங்கேறும். பிடிக்குதோ இல்லையோ அந்த வயதில் அம்மாவிடம் திட்டு வாங்கி கொண்டு அங்கே எப்படியும் போய்விடுவேன். அந்த கூட்டத்தில் படத்தை பார்ப்பதில் அப்படி ஒரு மகிழ்ச்சி.சமயத்தில் அப்படியே தூங்கி விடுவதும் உண்டு.ஏதோ கூட்டு குடும்பமாய் இருந்ததில் தப்பித்தேன். அப்பாவோ சித்தப்பாவோ பெரியண்ணாவோ ஒவ்வொருவரும் முறை வைத்து என்னைத் தேடி வீட்டிற்கு தூக்கி வருவர்.

இதில் என்ன வேடிக்கை என்றால் ஒரு முறை பலமாக காற்று அடித்தால் திரை "சமாதானக் கொடி"யாக மாறியிருக்கும்.அவ்வப்போது வருண பகவானின் விஜயமும் நடக்கும். அப்போது மட்டும் நானாகவே வீடு வந்து சேர்வேன்.(அழுதுகொண்டு... மழைக்கு டூ விட்டு).மேலும் பெரியார், அண்ணா பிறந்தநாள் என்றால் கேட்கவே வேண்டாம். எங்கள் தெருவே திமிலோகப்படும். இரவும் பகலாக காட்சியளிக்கும்.(உபயம்: எங்கள் வீட்டு மின்சாரம், விளக்குகள்-எதிர் வீடு, நிர்வாகம்.....பெரியார் அண்ணா நினைவகம்). என்னமோ தெரியவில்லை இவர்வகளும் '999' முறையாக "ஓர் இரவு" அல்லது "அரச கட்டளை" படங்களையே அரங்கேற்றுவர்.எம்.ஜி.ஆர் இந்த ஒரு படத்தில் மட்டும் தான் நடித்திருக்கிறார் என்று நினைத்ததுண்டு.

இன்று இருபது ஆண்டுகள் கடந்தோடி விட்டன. மாலையில் நண்பனொருவன் கல்லூரியில் யேர்மனி Vச் நெதர்லாந்து கால்பந்தாட்டம் திறந்தவெளி அரங்கில் ஒலி-ஒளி செய்யப்படும் என்றான். கேட்டவுடன் மனம் துள்ளிக் குதித்தது. அவை கிளறிய நினைவுகளே மேலே!! கால்பந்தாட்டம் முடிந்தவுடன் சூட்டோடு சூட்டாக இந்த பதிவு. ஆட்டம் துவங்கி முதல் 30 நிமிடத்துக்குள் யேர்மன் பாலக் ஒரு கோலை போட்டுவிட்டார். மேலும் 15 நிமிடம் பந்து அங்கும் இங்கும் சென்றதே தவிர கோல் என்ற ஒன்று மட்டும் விழவேயில்லை. பாவம் நெதர்லாந்துக்காரர்கள் சற்று திணறித்தான் போனார்கள். இடைவேளைக்கு பிறகு உஷாராகிவிட்டார்கள். பந்து இவர்களிடமே நீண்ட நேரம் உதை வாங்கியது(இருந்தும் பந்திற்கு பதிலாக அடிக்கடி எதிரணி வீரர்களின் பாதம் துவங்கி தலை வரை தங்களின் முத்திரை பதித்தனர்)என்ன செய்து என்ன பயன்? கோலை சமன் செய்யவே 78 நிமிடங்கள் ஆகிவிட்டது. கடைசி 12 நிமிடங்ள் விறுவிறுப்பாக கழிந்தன. 1 - 1 என்ற கோல் கணக்கே நீடித்தது. 2 நிமிடம் கால அவகாசம் நீட்டிக்கப்பட்டது.இருந்தும் பயனில்லை ஆட்டம் வெற்றி தோல்வியின்றி முடிந்தது.

ஆணவம் விட்டொழி ! (ego)

2004-06-14T13:35:00.000+02:00

இதயம் ஒன்று உண்டா உனக்கு?
என்ன நினைக்கிறாய்?
என்ன செய்கிறாய்?
சிந்தனை என்பதை என்று நீ மறந்தாய்?
யாரை பின் பற்றுகிறாய்?
எதை நோக்கிப் போகிறாய்?
யாருமற்ற தீவில் உனக்கென்ன வேலை?
மனிதம் தொலைத்து விட்டாயா?
அன்பு என்றால் அறிவாயா?
காதலைத்தான் உணர்வாயா?
நட்பின் ஆழம் புரியாதா?
உழைப்பின் உன்னதம் உரைக்கவில்லயா?
உயிர் வாழ்தல் மட்டும் கடமையா?
ஏகாந்தம் உனது பிறப்பிடமா?
சோம்பல் என்பது உன் சொத்தா?
ஒழுங்கீனமே உன் ஒழுக்கமா?
இதனால் என்ன கண்டாய் நீ?!!!

90 வயசு வாலிபர்

2004-06-11T19:03:00.000+02:00

எங்க கல்லூரி புண்ணியத்துல.... இரண்டு மாசத்துக்கு முன்னாடி 90 வயசு பெரியவர்.. இல்லை.. தப்பு. .வாலிபர் ஒருத்தரை சந்தித்தேன்.அவர் வந்தது "சைக்கிள்" வண்டியில். ஒரு மணி நேரம் அவரும் நானும் பேசிக்கொண்டு இருந்தோம்.பேச்சை அவர் ஆரம்பித்தது இரண்டாம் உலகப் போர்ல இருந்து... பின்ன இருக்காதா?! அவரு தீவிரமா அமெரிக்க படைகள் எதிர்த்து சண்டை போட்டவராச்சே!

நம்ம வாலிபர் பேரு அல்போன்ஸ் முல்லர். ஜெர்மன் ஹிட்லர் படையைச் சேர்ந்தவரு! ஆளு இன்னும் எவ்வளவு துடிப்பா இருக்காரு தெரியுமா?! வாரத்துல ஒரு நாளு மீன் கணக்கா நீந்தராரு... அப்புறமா சூடா ஒரு நீராவிக்குளியல் .. ம்க்கும்.. நீங்க பெருமூச்சு விடரது கேட்குது! பெண்கள் விசயத்துல ஆளு எப்படின்னு கேட்க வரீங்கதானே: ஆளு இதுல நம்ம ராமருங்க!! 60 வருசமா ஒரே மனைவிங்க..அவுங்க பேரு சோபி முல்லர்.

இரெண்டு பேரும் இணைபிரியா தம்பதிகள். வரும் ஜூலை 15,2004 அவுங்களோட 60 ஆண்டு திருமண வாழ்க்கை நிறைவு விழா! வாழ்த்த வயதில்லை நமக்கு.. அவுங்க ஆசிகள் நமக்கு கிடைக்கட்டுமே.நம்ம இளைய தலைமுறைக்கு அவர்கள் சொன்னது: வாழ்க்கைல வெற்றிதோல்வி கஷ்டம் நஷ்டம் மாறி மாறி தான் வரும்.எல்லாத்தயும் போராடித் தான் ஜெயிக்கனும். போர் காலத்துல சாப்பாடே இல்லாம கஷ்டப்பட்டோம். அதுக்கு நடுவுலயும் அடைக்கலம் கேட்ட ஒரு ஹங்கேரி குடும்பத்துக்கும் இடம் குடுத்தோம். போருக்கு பின்னாடி விவசாயம் செஞ்சு குடும்பத்தை நடத்தினோம். இன்றைக்கு எல்லோரும் நல்லா இருக்கோம். எப்பவுமே போராடி உழைச்சா வெற்றி நிச்சயம்.

(கவிதை மட்டுமே இடம் பெற்று வந்த இந்த பதிவில்..இனி எல்லாம் கலந்து கட்டி எழுத முயற்சிக்கிறேன்.)

மணமும் மனமும்!!

2004-06-08T22:11:00.000+02:00

மணம் வந்த திசைனோக்கி
மனம் திரும்பியது
கால பொறியையும் -ஏன்
ஒளியின் வேகத்தையும்
மிஞ்சிவிட்டது அதன் ஓட்டம்
சட்டென்று இரண்டாம் வகுப்பு
பள்ளி முடிந்து வீட்டிற்கு பயணம்
தெரு முனையிலேயே அதே மணம்
அம்மாவின் கைகள் உருவாக்கும்
ஒரு அற்புத படைப்பு
பண்டிகை நாட்களில் மட்டுமே கிடைக்கும்!
நாளெல்லாம் இதற்காகவே காத்திருப்பேன்
இதோ சில நொடிகளில் கடிபடும்
என் ஆசை "முறுக்கு".

என்னை தானம் செய்திடுவீர் !!

2004-06-04T16:54:00.000+02:00

அசைந்தாடும் தென்னைகள்
வெண்ணிறக் குளக்கரையோரம்
அதில் கருப்புத்தோணிப் பயணம்
ஒன்றல்ல நான் இரண்டாவேன்!
அனைவரையும் வசீகரிப்பேன்!
உலகை உணர்த்திடுவேன்
நிறங்களை வகைப்படுத்துவேன்
நான் யாரோ? நான் யாரோ?
நானில்லாமல் ஒளியில்லை
உங்கள் வாழ்வினிலே!!
இறந்தாலும் வாழ்ந்திடுவேன்
மற்றவருக்கு புத்தொளியாய்!!
மறவாமல் என்னை
தானம் செய்திடுவீர்!
உங்கல் விழிகளாலே மற்றவர்
வாழ்வில் ஒளியேற்றிடுவீர்!

(நீண்ட இடைவேளைக்கு மன்னிக்கவும்.)

சாளரமும் கையசைப்பும்!

2004-04-28T16:15:00.000+02:00

இன்று என் சாளரத்தின் வெளியே
எதையோ தேடி கொண்டிருந்தேன்.
ஒரு வேளை...

முந்தைய நாள் பெய்த மழையில்
நான் நனையாமலே நனைந்து போன
என் மனதின் நிழலுருவங்களாய் இருக்கலாம்.

"பொட்டி,படுக்கை" கட்டிட்டு சீக்கரம் வந்து சேரு
என்று சொல்லி நான் வருவதற்குள் இறைவனடி சேர்ந்த
பாட்டியின் அன்பையோ?! அரவணைப்பையோ மீண்டும் தேடியிருக்கலாம்.

உறவுகளில் தொலைத்த சந்தோசங்ளை
இன்று நட்பு-இட்டு நிரப்பும் முயற்சிகளில்
காணப்படும் நிறைவுகளின் நிறத்தை கண்டுகொள்ள முயற்சித்திருக்கலாம்.

செய்ய வேண்டும் என்று நினைத்து
செய்யாமல் போனதால் விழைந்த நன்மை-தீமைகளை
செதுக்கி வைக்கும் மனச்சிற்பியின் ஓசையாயிருக்கலாம்.

இவற்றின் நடுவே காரில் சென்ற சிறுமி ஒருத்தி...

தனது பிஞ்சுக் கரத்தை என்னை நோக்கி அசைத்தாள்
ஏனோ! குழந்தையாகி நானும் அதையே செய்தேன்
அவள் தகப்பனின் கேலிச் சிரிப்பையும் பொருட்படுத்தாமல்.

விடுதலை வேண்டும்

2004-04-28T10:33:00.000+02:00

விடுதலை வேண்டும்
எனக்கு
என்னுள் இருந்துகொண்டு
என்னையே ஆட்டிபடைக்கும்
மனசிடமிருந்து!

Life நட்பு+=வலைப்பூ;

2004-04-22T22:27:00.000+02:00

காலை மாலை
ஏன் இரவிலும்
எந்த நேரமும்
சந்திப்போம்
விடியலை தாண்டியும் உரையாடுவோம்
பட்டம் பெற்றோம்
வெவ்வேறு உலகம் ஆனோம்
மின்னஞ்சல் பரிமாற்றம்
எப்போதாவது நடக்கும்.
"How are u?!
I am fine.
How is work going on.
Have a nice day."
இதுவே அதன் சாராம்சம்.
வறண்டு விட்ட உறவானது.
ஜீவனற்ற உயிரானது.
ஆனால் இன்று நட்பு
புத்துயிர் பெற்று
தமிழே ஜீவனாகி
"வலைப்பூ"வாய் பூத்திருக்கிறது!

ஜனனம்

2004-04-22T18:39:00.000+02:00

உயிரிருக்கும் வரை நிற்காமல்
தினம்தினம் ஏன்
நொடிக்கொரு முறை
ஓர் ஜனனம்
உலகெங்கும் குடும்பக் கட்டுபாடில்லை
எண்ணங்களை
பிரசவிக்கும் மனசுக்கு.

இது தான் "மயை"யா?

2004-04-22T10:00:00.000+02:00

மாரி பொழியும் வேளையில்
மயிலின் நடனம்
மந்தகாசப் புன்னகையில் புதுமணப்பெண்கள்
மண்வாசனையின் இன்ப வீச்சு
மனதோரமாய் ஒரு எண்ணக்கீற்று
முதன்முதலாய் பார்த்த மழை எப்போது?
மின்னல் இடியில் நடுநடுங்கி - நான்
"ம்மாவின்" இடுப்பில் கொடிபோல் தொற்ற
முந்தானையால் காபந்து செய்து அவள்
முன்வாசலுக்கு என்னை அழைத்துப் போக
மலங்க மலங்க விழிகள் உருட்டி
மழலை மாறாமல் நான் கேட்டேன்
ம்மா! ம்மா! இது தான் "மயை"யா? (மழையா).

இலையுதிர் காலம்!

2004-04-15T21:32:00.000+02:00

இலையுதிர் காலம்!
இருந்தும்
உதிர்க்க முடியவில்லை
அந்த மரங்களை போல்
அவனால்!
உணர்வுகளை!.

1000 குழந்தைகள்?! (சின்னஞ்சிறு கதை)

2004-04-15T21:16:00.000+02:00

ஆயிரம் குழந்தைகள்?!
அவளுக்கு
இன்னும் மணமாகவில்லை!
எப்படி சாத்தியம்!
ஒரே சலசலப்பு!
அந்த கிராமத்து வீட்டிலே!
பெண் பார்க்க வந்தவன்
கிளம்பத் தயாரானான்!
"1000" ஓவியங்களை அவள் நீட்ட
அவன் நெளிந்தான்.
படைப்புகள் கலைஞனுக்கு குழந்தைகள் அன்றோ?

"தாய்"க்கு தன் குழந்தையைத் தெரியாதா?

2004-04-15T20:46:00.000+02:00

மனசே என் மனசே
எதை நீ தேடுகிறாய்?
சொல்லிவிட்டுத் தேடு!
கரங்கள் உண்டு சேவை செய்ய!
கண்கள் உண்டு கண்டு சொல்ல!
ஒருவேளை...
உணர்வை நீ தேடினால்?!!
நான் என்ன செய்ய?!
அது உன்னில்லிருந்தே பிறக்கிறது!
"தாய்"க்கு தன் குழந்தையைத் தெரியாதா?

இனிய தமிழ் புத்தாண்டு வாழ்த்துக்கள் !

2004-04-13T11:19:00.000+02:00

அன்பு நட்பு உள்ளங்களே!
அன்பும் பண்பும்
குணமும் ஓங்கி
வாழ்வில் என்றும்
மன மகிழ்ச்சியோடு
எல்லா வளத்துடன்
அனனவரும் செழிப்புடன்
வாழ தாரண தேவி
அருள் புரிவாள்.

கனவு !(கவிதை நடையில் ஒரு சிறுகதை முயற்சி)

2004-04-08T21:05:00.000+02:00

அப்பத்தா?!
கனவுன்னா என்ன?
எப்ப வரும்?!.

சொல்லிபுட்டு வருமா?
கனவு?!
அதுவாத்தேன் வரும்.

பள்ளிகூடத்துல!
அல்லாரும் சொல்லராங்களே!
அவுங்க கனவு என்னன்னு!

சொல்லாட்டி!
வாத்தியாரு அடிப்பாரு!
சொல்லு அப்பத்தா!

கருக்கல் இருந்து
தொங்கிட்டு இருக்க!
சோளி கடக்குதுல்ல!

பொறவு
அப்பத்தாளும் வெலுத்துப்புடுவேன்!
நகரு அங்கிட்டு!

சிவகாமி!
புள்ளைய தூக்கிட்டு போ!
கழனி வரை போயாரேன்!

ஆத்தா! ஆத்தா!
நீயாவுது சொல்லாத்தா!
கனவுன்னா என்ன?

அது ராவுல!
ஒறங்குனதுக்குப் பொறவு
வரும் ராசா!

ஒறங்குனதுக்குப் பொறவா!
எப்படியாத்தா வரும்!
எங்கிட்டுருந்து வரும்!

சரியா போச்சு போ!
உங்கொப்பன் வந்ததும்
அவருகிட்டியே கேளு!

சிவகாமி! சிவகாமி!
மனுசனுக்கு நாக்கு வரளுது
மோரு கொண்டா புள்ள!

அப்பா!அப்பா!...

என்னடா !
முட்டாய் வேணுமா!
இந்தா சாப்புடு!

அதில்லப்பா!
கனவு பத்தி சொல்லுப்பா!
வாத்தியாரு கேட்டாரு!

என்னது! கனவா?!
அதுக்கு எனக்கெங்க நேரம்!
ராப்பகல்லா தூங்காம கெடக்கேன்!

அவனுக்கு யாருமே
பதில் சொல்லவில்லை
ஒரு வழியாய் தூங்கி போனான்.

காலையில் பள்ளிக்கு
பயந்து பயந்து
சென்றான்.

பக்கத்து பெஞ்சு
நண்பன்....

"டாக்டர்"
ஆகோனும் சார்!-என்றான்
வாத்தியாரின் கேள்விக்கு!

இவன் முறைவர
இவனும்
அதையே சொல்லி வைத்தான்.

பாவம்
கடைசி வரை அவனுக்கு
கனவு என்றால் என்ன்வென்று தெரியவில்லை.

என் ஜன்னல் உலகம்!

2004-04-07T19:03:00.000+02:00

ஆய்வுகூடத்தில்
என் இருக்கை
முன்னே அரை-ஆளுயர ஜன்னல்!

உள்ளே
நான் நுழைந்ததும்
திறப்பது இதைத்தான்!

ஒளிவெள்ளம்
பெருகி என்
வேலை துவங்க ஊக்கம்தரும்.

இடையிடையே
பணிக்களைப்பில் என்
பார்வை ஜன்னலுக்கு வெளியே.

அழகான
மஞ்சள் பூமரம்
காற்றோடு சண்டைப் பிடிக்கும்.

எங்கிருந்தோ
வரும் குருவிகள்
அதில் கொஞ்சம் இளைப்பாறும்.

சற்று தள்ளியிருக்கும்
வண்டிகள் நிறுத்துமிடம்
உலகமயமாக்கலை பறைசாற்றும்.

மீண்டும்
மனம் என்
வேலைகளில் பதியும்.

மஞ்சள்நிற-தபால்வண்டி
கவனத்தை ஈர்க்கும்
"மணி 11.00"-என்று சொல்லாமல் சொல்லும்.

எப்போதவது "சைரன்"-ஒலி
விண்னைப் பிளக்கும்
எங்கோ உயிரல்லாடுவதை உணர்த்தும்.

ஒன்றன்பின்
ஒன்றாக சீறும் வண்டிகள்
மதிய இடைவேளையை அறிவிக்கும்.

எப்போது
திரும்பி வரும்
யாருக்கும் தெரியாது வராமலும் போகலாம்.

பக்கவாட்டில்
உள்ளது ஒரு தோட்டம்
மதியநேர விளையாட்டு மைதானம்.

இது
முதியவர்களின் 'நடை'பழகுமிடம்
குழந்தைகளின் 'வால்'வளருமிடம்.

பள்ளி
மூடும் நேரமானால்
கொத்து கொத்தாய் சிறார்கூட்டம்.

இரை
தேடிய பறவைக் கூட்டம்
கூடு தேடி ஓட்டம்.

சிறிது நேரத்தில்
(மறுபடியும்) சீறும் வண்டிகள் விடைபெறும்
மாலைவகுப்பிற்காய் சில நுழையும்.

இதோடு
என் ஜன்னலும்
மூடிக் கொள்ளும்!

ஏழ்மை

2004-04-06T16:56:00.000+02:00

விலை என்ன?
வருபவர்களின்
முதல் கேள்வி-இது தான்!
சந்தையிலே!
பொருளில்லா கடையிலே
என்னை விற்க
நான் என்ன விலை சொல்ல?!

ஜெர்மனியில் கோடைகாலம் !

2004-04-01T12:00:00.001+02:00

சின்ன சின்ன பூக்கள் இங்கே
பார்த்தாலே பரவசம்
குல்மொகாரின் அழகிலே
மனம் போகுதே ஊர்வலம்.

சாலையோர பூக்களும் கூட
William Wordsworth- ன் "..The Golden yellow Daffodils"
அழகோ அழகு
கோடையிலே ஜெர்மனி அழகு.

ஒன்றரை அடி செடிகள் தருமே
கருஞ்சிகப்பு தேன் Strawberry!
இயற்கையின் படைப்பிலே
இதுவும் ஒரு தனிச்சிறப்பு.

மங்கையரின் ஆடைக்குறைப்பு
னம் Bollywood-யும் தோற்கடிக்கும்
ஆடவர்கள் மட்டும் என்ன?
நம் சல்மானின் 'குரு'மார்கள்.

வீட்டிலே எவருமில்லை
சாலையிலே நிற்க இடமில்லை
ஜெர்மனியின் மக்கள் இருப்பு
கோடையில் தானே தெரிகிறது.

ஆண்பெண் சமத்துவம்
பீர் குடிப்பதிலுமா?
ஒரே கொண்டாட்டம் கும்மாளம்
இசையோடு ஒரு தெருகூத்தே அரங்கேறும்.

2004-03-27T20:00:00.000+01:00

நட்சத்திரங்கள்?!

என் மன வானில்
எத்தனை
நட்சத்திரங்கள்?!

ஒவ்வொன்றாய்
எண்ணிப்
பார்க்கிறேன்.

பள்ளிப்பருவம்
தொட்டு
பால்ய காலம்வரை!

கல்லூரி
முதல்
இன்று வரை.

சில நேரம்
மட்டும்
அவை பிரகாசிப்பதுண்டு.

பல நேரம்
அவை
என்னைச் சுட்டெரிக்கின்றன.

இருந்தாலும்
அனைத்துமே
என்னைச் சேர்ந்தவை.

எவரிடமும்
அதை
கொடுத்து விட முடியாது.

பிடிக்கவில்லை
என்று
தூக்கியெறியவும் இயலாது.

என்னுள்
என்னோடே
பின்னப்பட்டு இருப்பவை

2004-03-26T00:34:00.000+01:00

வெளிநாட்டு மாணவர் வாழ்க்கை

உள்ளம் முழுக்க கனவுகளுடன்
கால் பதித்தோம் இங்கே!
சிதறிய ஓர் மாதுளையின் முத்துகளாய்
ஒவ்வொருவரும் ஓர் திசையில்.

லட்சியங்கள் வென்றிட அனுதினமும்
அயராது உழைக்கிறோம் இங்கே!
புதிய கலாச்சாரம் ! வாழ்க்கை முறை!
எங்களை எங்கோ அழைத்து செல்கிறது!

சில பிறழ்வுகள் விரும்பியும் விரும்பாமலும்
அடிமனசிலே ஓர் இனம்புரியா வெறுமை
மாமியார் வீடு வந்த மாட்டுப்பெண் போல
என்று ? அது நீங்கும் ?!!

அறியாமலே நகர்கிறது நாட்கள்!
ஏன் எங்கள் வாழ்க்கையும் தான்.
நாற்றங்காலாய் இருக்க விழைகிறோம்
(இந்த)அரசாங்கமோ எங்களை வேரறுத்த மரமாக்குகிறது.

இது சரியா? தவறா? குரலெழுப்பவும் வழியில்லை!
எனினும் முளைத்திடல் வேண்டுமல்லவா?
ஏதோ ஓர் நம்பிக்கையுடன் இங்கே
யுத்தம் நடத்திக் கொண்டு இருக்கிறோம்! வெற்றி பெறுவோம்!

2004-03-25T13:17:00.000+01:00

கிரிக்கெட் வெற்றி

கொண்டாடு மனமே
நீ கூத்தாடு
வெற்றி நமதே
வெற்றி நமதே!

சங்கே நீ முழங்கு
சரிகம பத பாடு
இந்தியா வென்றது
இந்தியா வென்றது.

திக்கெட்டும் பரவட்டும்
வீரர்களின் புகழ்மாலை
வாழ்க நம் வீரர்
வாழ்க நம் வீரர்

ஏழு வருடங்களுக்கு பின்
நாம் கண்ட வெற்றி
ஏளன பார்வைக்கு
கொடுத்து விட்டோம் வட்டி.

வாழ்க நம் வீரர்
வாழ்க நம் வீரர்.

2004-03-25T00:09:00.000+01:00

நண்பர்களின் படைப்பு

இன்பம் பொங்கி வழிந்ததே
துன்பம் எல்லாம் தொலைந்ததே
தங்கு தடையின்றி இணையத்திலே
தமிழில் நானும் எழுதிடவே.

நண்பர்கள் படைப்பை கண்டதும்
உள்ளம் குழந்தையாகி குதித்ததே
கவிதை படைக்க துடித்ததே
ஆற்றல் கொண்டு எழுந்ததே!

பக்கம் பக்கமாய் எழுதிடு
பாரெங்கும் பதித்திடு
உணர்வுகள் பகிர்ந்திடு
உவகைகள் அடைந்திடு!

என்று என் மனம்
எனக்குச் சொன்னது
அதுவே கவியாய் அமைந்தது
மீண்டும் சந்திப்போம்!

2004-03-22T21:45:00.000+01:00

Hello friends ! I love nature.I would like to travel a lot.I write poems,rather it is my feelings.I would like to share some of them with you.I would like to write a lot.Also i welcome your comments and ur suggestion on it.You can also suggest me books to read on to improve my kavithai skills.
Hope we will have a nice time.

With love,
kavivalar

Panimalai !
Vellaadai Kattikonda
Velinattu pennoruthiyai
Vetkamilal verithu paarkiren!